“Data Jurnalistika” kitabının tədris vəsaiti kimi qəbul edilməsi çox faydalı olardı”

 
 
 
 

Sentyabrın 4-də Mingəçevir  Turizm  Kollecində  (MTK) Azərbaycan dilinə çevrilmiş “Data Jurnalistikası” kitabının  müzakirəsi keçirilib. Kollecin ideoloji mərkəzində təşkil olunan tədbiri  MTK-nın direktoru, iqtisad elmləri doktoru, professor Əyyub Əyyubov açıb. O,  informasiyanın həyatımızın ən vacib elementinə çevrildiyini,  son illər onlayn medianın ənənəvi mətbuatı sıxışdırdığını bildirib:  “Bu gün hər sahədə olduğu kimi, jurnalistikada da ixtisaslaşma gedir.  Ölkəmizin böyük turizm potensialı olduğundan turizm jurnalistikasının yaranmasına da ehtiyac var. Turizm təhsili alan insanlar bu sahədə daha yaxşı fəaliyyət göstərə bilərlər.  Düşünürəm ki, Azərbaycan dilinə çevrilən  “Data Jurnalistika” kitabının  gələcəkdə  həm bizim kollecdə, həm də digər orta və ali ixtisas məktəblərində tədris vəsaiti kimi qəbul edilməsi çox faydalı olardı”.

Mingəçevir Valideynlər Assosiasiyasının prezidenti  (MVA)  Fərman  Nəbiyev  kitabın Avropa Birliyinin maliyyələşdirdiyi və BMT İnkişaf Proqramı tərəfindən həyata keçirilən “Əhalinin həssas qruplarının sosial-iqtisadi hüquqlarının təmin olunmasında vətəndaş cəmiyyətinin rolunun gücləndirilməsi” layihəsi çərçivəsində  hazırlandığını diqqətə çatdırıb:  “Ötən ilin noyabrından etibarən  açıq məlumatlara dair  Azərbaycanda və Avropada QHT, dövlət qurumları və KİV nümayəndələri üçün təlimlər aparılıb. Məqsəd  bu insanlara açıq məlumatları hamının başa düşəcəyi şəkildə təqdim etməyi öyrətməkdir”.

Natiq  vurğulayıb ki, 7 bölmədən ibarət olan kitabda çoxlu nümunə hekayələri toplanıb: “Bu kitab məlumatın əldə edilməsi, başa düşülməsi və çatdırılması üçün əvəzsiz vəsaitdir.  Bu gün heç kim uzun-uzadı informasiyaları oxumaqda maraqlı deyil, buna vaxt da yoxdur. Amma hər kəs məlumatların əyaniləşdirilmiş formalarına-xəritələrə, cədvəl və diaqramlara həvəslə baxır”.

F.Nəbiyev  kitabın müzakirəsinə toplaşanlara  data jurnalistika ilə bağlı nümunələri də təqdim edib: “Baxın, Belorusda bütün sərhəd-buraxılış  məntəqələrinin canlı xəritəsi yaradılıb. Ölkəyə gəlmək və ölkədən çıxmaq istəyənlər bu xəritəyə baxmaqla hansı məntəqədə nə qədər növbə olduğunu onlayn izləyə bilirlər. Bu bilgi zamana və pula qənaət  deməkdir”.

MVA rəhbəri  data.org.az  səhifəsində distant təlimlərin aparılması,  məlumatların toplanıb Excel cədvəlinə salınması, statistik məlumatın yoxlanması, mənbələrdən ilkin məlumatların əldə olunması, şəkillər və cədvəllər üzərində iş görülməsi  barədə də danışıb,   müxtəlif formalı diaqram və cədvəllərin necə hazırlandığını nümayiş etdirib.

Müəllim və tələbələr müzakirədən məmnun qaldıqlarını bildiriblər. Onların bir neçəsi elə təlim prosesində öz mobil telefonlarından  data.org.az səhifəsinə daxil oaraq, qeydiyyata düşüblər. 

Məqalə Qiyməti